Mensagem

MA-tomada-de-posse-2

Prezidente Autoridade Rejiaun Administrativa Espesiál Oé-Cusse Ambeno no Zonas Espesiál Ekonomia Sosiál Merkadu Timor-Leste.

Dala-dalas ita-nia mundu hasouru susar todan, sosiál nomós polítiku, bainhira krize ekonómika hamosu. Tinan ba tinan, foin la kleur liubá, buat hotu-hotu hala’o tuir modelu ne’ebé iha no, hosi sorin-mai ka hosi sorin-bá, hanesan mundu ne’e fahe ba rua fali no sorin ida-idak haklaken katak ida maka iha ai-moruk natoon hodi hadi’ak vida di’akliu ida seluk. Loloos, sistema hosi modelu rua ne’ebá la hadi’ak buat ida tomak tan de’it haluhan katak, atu haburas buat be’ebé de’it iha vida, tenke hanorin no haburas uluk lai ita nu’udar ema.

Ita la bele nega katak ita-nia vida harii-an tuir moris sosiál no, hanesan ne’e, ita hola parte iha buat ruma seluk boot ne’ebé hanaran sosiedade. Nune’e, ida-idak moris ninian maibé moris hela iha buat ruma seluk nia leet, hodi hola parte iha sosiedade ne’ebá no lisuk hamutuk ho ema hotu-hotu iha lala’ok sosiál, polítika, kulturál no ekonómika, maske ida-idak tuir nia an rasik. Bainhira loke dalan atu ema hotu bele hola parte maka prosesu dezenvolvimentu ida bele sai justu no bele fahe rikusoin ba ema barakliu ka ema hotu-hotu bele koko-hetan moris di’ak.

Tuir ida-ne’e, ita bele dehan katak modelu dezenvolvimentu tempu uluk nian la hafuan tan fini ruma, hosi hanoin folozófiku ka liuhosi hala’ok ne’ebé hatudu buras sala, no modelu tuan ne’e hamout nia an rasik. La’ós tanba merkadu maka sala nu’udar fatór dinamizadór no reguladór ba ekonomia. Oinsá uza merkadu lahó regra, no husik hela boboot sira lohi oioin hodi sosa no fa’an arbiru, atu manan barak no lalais, maka hamosu ambiente sósiu-ekonómiku ida-ne’ebé la kontrola no la sai nu’udar justu ba ema.

Tenke dehan mós katak bainhira modelu ekonómiku ida la tau matan ba sorin sosiál, iha prosesu dezenvolvimentu, sei hamosu konflitu tanba balun hetan no balun lae. La iha justisa sosiál tan rikusoin la fahe hanesan maske ema hotu-hotu tada terus no kosar-been hanesan.

Sosiedade foun ne’ebé ita hakarak harii tenke nu’udar inkluzivu – nakloke no la taka dalan ba ema ida, nu’udar justu – fahe rikusoin ba ema hotu, no, nu’udar dinámiku – badinas ho kbiit atu la’o ba oin. Sistema iha sosiedade foun ne’e nia leet tenke hafolin ema ida-idak nia kualidade no hala’o buat hirak-ne’ebé tenke hala’o, liuhosi prosesu dinámiku, hodi haburas progresu ba ema hotu. Tan ne’e maka urjente duni atu harii paradigma foun no ne’e dehan katak modelu foun ida, nu’udar ezemplu ho kbiit, atubele hasouru no hafoun buat hotu hosi dalan tuan.

Tenke halo oin ida atu mundu ne’ebé ema hotu nian, bele sai di’ak ba ema hotu-hotu.

Ha’u sori Ekonomia Sosiál Merkadu nian ho fiar katak konseitu foun ne’e, hafoin hanoin klean, iha hun atubele taka konseitu tuan nia fatin, tan modelu tuan la bele la’o ona. Hodi hanoin moris foun ida ba ema nia di’ak maka hamosu Zona Espesiál Ekonomia Merkadu nian iha Timor-Leste no hili tiha enklave Oé-Cusse Ambeno nu’udar fatin dahuluk atu hahú projetu-pilotu, no hatutan ho rai-nusa Ataúro nu’udar polu komplementár.

Post ne'e disponível mo'os iha: Inglês, Português